«Һөнәрегез ихлас ихтирам һәм рәхмәт уята»

Бүген Уфада берничә мәйданчыкта Медицина хезмәткәре көне билгеләп үтелде. Андрей Назаров Авыл хуҗалыгы министрлыгының Колонналы залында бер төркем хезмәт алдынгыларына дәүләт бүләкләре тапшырды.

Премьер-министр үзенең тәбрикләү сүзендә медицина хезмәткәрләренең югары хезмәтен билгеләп үтте. «Медицинада очраклы кешеләр юк. Бу югары хезмәт — үз өстенә зур җаваплылык ала белүчеләрнең өлеше. Сезнең һөнәрегез ихлас ихтирам һәм рәхмәт уята», — диде ул. Назаров шулай ук табиб, фельдшер, шәфкать туташы яки лаборант булсынмы, һәрберсенең фән, югары һөнәри осталык һәм тирән кешелеклелек чатында эш итүен ассызыклады.

Ул төбәктә сәламәтлек саклау тармагындагы казанышларга тукталды. Республика буенча медицина учреждениеләренең матди-техник базасын планлы рәвештә ныгыту дәвам итә. Узган ел алты поликлиника төзелгән, 137 фельдшер-акушерлык пункты, табиб амбулаторияләре һәм гомум практика табиблары офислары урнаштырылган. Модульле объектларны төзү темплары буенча Башкортстан Идел буе федераль округында беренче урында.

Андрей Назаров яңа хирургия корпусының республика кардиоүзәгендә сафка кертелүен билгеләде. «Ул йөрәк-кан тамырлары авырулары вакытында югары технологияле медицина ярдәмен алу мөмкинлеген һәм сыйфатын сизелерлек арттырды», — диде ул. Узган ел 99 санитар автомобиль һәм 11 меңгә якын берәмлек заманча медицина җиһазы сатып алынды. Алдагы планнарда — 100 берәмлек заманча диагностика җиһазы сатып алу, югары технологияле ярдәм күләмен, шул исәптән бөер трансплантациясе кебек катлаулы операцияләрне арттыру.

Премьер-министр ассызыклаганча, Ватанны саклаучылар турында кайгырту төп өстенлек булып кала. Башкортстаннан дистәләгән табиб, фельдшер, шәфкать туташлары махсус хәрби операция зонасында хезмәт итә. Бу — югары һөнәри осталык һәм чын батырлык үрнәге, диде ул, горурлыгын белдерде.

Намуслы хезмәтләре өчен Андрей Назаров 30 медицина хезмәткәренә дәүләт бүләкләре һәм мактаулы исемнәр тапшырды. Толбазы үзәк район дәваханәсенең психиатр-наркологы Виталий Тарасов «Хезмәт батырлыгы өчен» медаленә ия булды. Өч хезмәткәр Башкортстан Республикасының Мактау грамотасы белән бүләкләнде. Калганнарга «Башкортстанның атказанган табибы» һәм «Башкортстанның атказанган медицина хезмәткәре» исемнәре бирелде.

Шуларның берсе — Республика балалар клиник дәваханәсенең табиб-анестезиологы-реаниматологы Алик Мирасов. Ул бу дәваханәдә 24 ел эшли. Үз сүзендә ул төрле районнардан килгән балаларга операцияләр ясавы, санитар авиация белән эшләве, ашыгыч ярдәм күрсәтүе турында сөйләде. «Һөнәремне яратам. Табиб юлын сайлауга үкенмим. Балаларга ярдәм итә алу, хезмәтнең нәтиҗәсен күрү сөендерә», — диде ул. «Бүген мондый югары исемгә лаек булуым хезмәттәшләремнең дә, миңа терәк булган якыннарымның да казанышы ул», — дип өстәде.

Гаиләсе турында сорагач, Мирасов шаяртып, медикларның шәхси тормышка вакыты аз, шуңа алар бер-берсе белән гаилә коруын әйтте. Аның хатыны да табибә, өч баласы бар. Өлкән кызы да БДМУга укырга кергән.

«Башкортстанның атказанган табибы» исеменә лаек булган Сибай үзәк шәһәр дәваханәсенең табиб-стоматолог-терапевты Рәүф Әбүбакиров та бик шатлыклы хисләр кичерүен белдерде. Аның гомум хезмәт стажы 45 ел, шуның 30 елы Сибайда. Ул мондый казанышларны күрү тагын да нәтиҗәлерәк эшләргә көч өсти дип саный.